खुलेको महिना पनि नबित्दै विराटचोकको कर कार्यालयमा ठगिन थाले सर्वसाधारण

  • ११ आश्विन २०७५, बिहीबार
  • 1194 पटक पढिएको

मोरङ /   मोरङको उत्तरी भेगका जनतालाई राहत होस् भन्ने उदेश्यले विराटचोकमा स्थापना भएको करदाता सेवा कार्यालयको सेवा प्रवाहबारे  गुनासो बढ्न थालेको छ ।

गत भदौ १८ गते त्यस भेगका व्यवसायीहरुको पहलमा स्थापना भएको कर सेवा कार्यालयको सेवाबारे  खुलेको महिना दिन पनि नबित्दै सुनासो बढ्न थालेको हो । हाल सेवा सहजीकरण गर्न बसेका काउण्टरका मानिसहरुबाट नै सेवाग्राहीहरू ठगिन पुगेका छन् ।

वर्षमा रु २० लाखभन्दा कम कारोबार भएको र रु २ लाख ५० हजार सम्म आय हुने प्रकृतिका व्यवसायीक व्यक्ति  तथा फर्मले गाँउपालिकाको हकमा १५ सय र नगरपालीकाको हकमा २५ सय वार्षीक तिर्नुपर्ने व्यवस्था छ । नयाँ फर्म दर्ताको लागी स्थानीय निकायको सिफारीस र उपयुक्त कागजात भएपछि निःशुल्क दर्ता गर्नुपर्ने व्यवस्था रहेको छ । तर गत आईतवार नयाँ व्यवसायीक फर्म दर्ता गर्न बिराटचोक पुगेका बेलवारी ११ लक्ष्मीमार्गका नविन घिमिरेलाइ  “सबै कागजात पुरा हुँदा हुँदै फर्म भरिदिने भन्दै कार्यालय छिर्ने बित्तिकै एक युवती आईन् र फर्म भरेर कम्प्युटर इन्ट्रि गरिदिन्छु रु ५ सय लाग्छ भनिन्”। नवीनले भने  “कर कार्यालय रहेको भुई तलामा आएर एक व्यत्तिलाई सोध्दा २ सयमा गर्दिन्छु भन्यो तर नेट स्लो छ आज हुँदैन भोली आउनु भन्यो र भोली जाँदा त्यँहा काम नहुने भएपछि अन्त्यमा ५ सय तिरेरै काम गर्नुको बिकल्प भएन र ५ सय तिरेरै काम गरे”।

कार्यालय भित्रै सेवाग्राहिको काम गरिदिनुपर्ने व्यवस्था हुँदा हुँदै अर्का एक व्यक्ति कमल राईले पनि नविकरण शुल्क २५ सय संगसंगै कम्प्युटर इन्ट्रि वापत २ सय तिर्नुपरेको गुनासो गरे । “५ सय माग्दै थिए, बार्गेलिङ गरेर मात्र २ सयमा गरेँ” राईले बताए । १५ सय र २५ सय तिर्न आँउदा २ सय देखी ५ सय सम्म कम्प्युटर इन्ट्रिको चार्ज भन्दै तिर्नुपर्दा सर्वसाधारणको गुनासो रहेको भेटिन्छ ।

व्यवसायीहरुको सेवालाई मध्यनजर गर्दै अव चाँडैनै कोशी हरैचा उध्योग वाणिज्य संघले कम्प्युटर ईन्ट्रि सहितको सहायता कक्ष स्थापना गर्ने कोशी हरैचा उध्योग वाणिज्य संघका अध्यक्ष नवराज चाँपागाँईले बताए । कार्यालय प्रमुख प्रकास राईले कर्मचारी अभाव र पुरै सिस्टम नआई सकेकोले यस्तो समस्या भएको र अव चाँडै नै यस्तो समस्या हट्ने जानकारी दिए ।