प्रदेश नम्बर २ की पहिलो महिला मेयरको फार्तिफुर्ती बढ्दै

रौतहट । प्रदेश नम्बर २ की पहिलो महिला मेयर रिना कुमारी साह ‘कविता’ ले ढिलासुस्ती नगरी जनताको काम गर्न मातहतका कर्मचारीहरुलाई निर्देशन दिनुभएको छ ।

रौतहटको मौलापुर नगरपालिकाको मेयर पदमा निर्वाचित साहले आफू पनि जनताको पिरमार्का बुझेर सेवामा खट्ने बताउनुहुँदै कर्मचारीलाई पनि जनताको पीडा बुझेर सेवामा खट्न निर्देशन दिनुभयो ।
रौतहटस्थित मौलापुर नगरपालिकाबाट निर्वाचित मेयर, उप–मेयर लागयत ९ वटै वार्डबाट विजयी अध्यक्ष्य तथा सदस्यहरुको स्वागत तथा अभिनन्दन कार्यक्रममा बोल्नुहुँदै साहले यस्तो निर्देशन दिनुभएको हो । उहाँले चुनावका कारण रोकीएको वृद्धभत्ता वितरणको कार्यलाई सुचारु गरिने बताउनुभयो ।
विकसित र समृद्ध समाज निर्माणको लागि महिलाको जागरण आवश्यक रहेको उल्लेख गर्नुहुँदै मेयर साहले त्यसका लागि घर–घरबाट पहल चाल्न आवश्यक रहेको बताउनुभयो । महिलाको जागरणका लागि आफू पनि लाग्ने बताउनुहुँदै उहाँले समृद्ध समाज निर्माणका लागि जागरुक महिला आवश्यक रहेकाले सम्पूर्ण पक्षले त्यसको पहल गर्नु आवश्यक रहेको बताउनुभयो । उहाँले केही समय पहिला बाढी र डुबानबाट पीडित भएकाहरुसम्म पुग्ने गरी राहत वितरणको कार्यलाई तिब्रता दिनुपर्ने बताउनुभयो ।
त्यसैगरी मौलापुर नगरपालिकाका उप–मेयर गौरीशंकर जयसवालले मौलापुरलाई नमुना नगरपालिकाको रुपमा विकास गर्न आफूहरु प्रतिबद्ध रहेको बताउनु भयो । उहाँले मौलापुरलाई नमुनाको रुपमा विकास गर्न निर्वाचित सबै टिमले एकसाथ मिलेर अगाडि बढ्ने बताउनुभयो । कार्यक्रममा मौलापुर स्थित विभिन्न सरकारी कार्यालयका कर्मचारीहरुको समेत उपस्थिति रहेको थियो ।

(नोट ः फोटो पुरानै हो, आजको कार्यक्रमको होइन ।)

Leave a Reply

Your email address will not be published. Required fields are marked *