अलैंचीमा रोग लागेपछि धनकुटाका कृषक नयाँ बगानतिर

ईश्वर थापा, धनकुटापुरानो बगानमा अनेक किसिमका रोग लाग्न थालेपछि धनकुटाका कृषकले अलैचीको नया बगान लगाउन थालेका छन् । उत्पादन घट्ने समस्याबाट जोगिन कृषि प्राविधिकको सिफारिसमा कृषकले नया बगान लगाउन थालेका छन् ।

मारेककटहरेका कृषक सुरेन्द्र पाण्डेले तीन वर्ष अघि बगानमा रोग देखेपछि नया अलैची लगाएको बताए । गानो कुहिने र पात सुक्ने रोग लागेर उत्पादन घट्न थालेपछि नया बगान लगाएको उनको भनाई छ । उनी जस्तै मारेककटहरे गाविसका अन्य कृषकले पनि पुरानो बगान मासेर नया बगान लगाउन थालेका छन् ।
किसानका लागि वैदेशिक मुद्रा आर्जनको गतिलो माध्यम बनेको नगदेबाली अलैची खेतीमा देखिएको दुरी रोगको संक्रमणका कारण पूर्वी पहाडमा अलैची बगान नष्ट हुने क्रम बढ्दो छ । रोगका कारण अलैची बगान नष्ट हुने क्रम बढ्दो छ । रोगका कारण अलैची खेतीको क्षेत्रफल घट्दै जान थालेपछि व्यवसायिक कृषि अनुसन्धान केन्द्र पाख्रिवासका कृषि वैज्ञानिक अलैचीमा लाग्ने रोगको अनुसन्धान व्यवस्थापनमा लागेका छन् ।
अनुसन्धानबाट प्राप्त प्रारम्भिक नतिजाका आधारमा वैज्ञानिकहरुले अलैचीको रोगग्रस्त बगानमा उपचार र विषादीको प्रयोग भन्दा भूगोल अनुसार सिफारिस गरिएको जातको विरुवा रोपेर नया बगान व्यवस्थापनमा संवेदनशील हुन कृषकलाई सुझाव दिएका छन् ।
कृषि अनुसन्धान केन्द्रका प्रमुख तथा वरिष्ठ वैज्ञानिक रामनारायण चौधरीले पुराना बगान मासेर नया बगान निर्माण गर्नु अनिवार्य भएको बताए । जति बगान पुरानो हुदै जान्छ अलैची खेतीमा उती समस्या थपिदै जाने भएकाले विकल्पको रुपमा नया बगान बनाउनु राम्रो हुने उनको सुझाव छ ।
कृषि वैज्ञानिकले परम्परागत गानो रोप्ने प्रविधिको खेती विस्तारलाई विस्थापन गरी बिउ र तन्तु प्रसार प्रविधिबाट तयार गरिएको बिरुवाको खेती सुरु गर्न सके ढुसी रोगको डर नहुने निष्कर्ष निकालेका छन् । अहिले कृषि अुसन्धान केन्द्रले बीउ र तन्तु प्रसार प्रविधिबाट ५० हजार अलैचीको बिरुवा उत्पादन गरिसकेको छ । नया बिरुवाको माग बढेकाले अनुसन्धान केन्द्रले थप नर्सरी व्यवस्थापन गरी वितरण गर्ने तयारी गरिरहेको चौधरीले बताए ।
कृषि विकास कार्यालयले अलैची खेती विस्तारका लागि कृषकलाई करिब १० हजार अलैचीको बेर्ना ५० प्रतिशत अनुदानमा वितरण गर्ने तयारी गरेको छ । (२९, माघ )

Leave a Reply

Your email address will not be published. Required fields are marked *